වෙජිටබල් පේස්ට්‍රි හදන හැටි

මම මේක බලාගත්තෙත් නෙට් එකේ රෙසිපි බ්ලොග් එකකින්. හරියටම කිව්වොත් මෙන්න මෙතනින්. ඉතින් ඕක චුට්ටක් වෙනස් කරලා, සිංහලෙන් දාන්නයි යන්නේ.

මුලින්ම මේක මම හැදුවේ යාලුවෙක්ගෙ උපන් දිනේකට. කෑව හැමෝම ගොඩක් ආස උන නිසා එදා ඉඳන් මම කට්ටිය එකතු වෙන පාටි, ට්‍රිප් වලට මේක හදනවා.

මේකේ ෆිලින් එකට එළවලු විතරක්ම දාන නිසා මස් මාළු කන්නේ නැති අයටත් කන්න පුළුවනි. ඔන්න දැන් මුලින්ම කියන්නේ, මේ තියෙන්නේ පේස්ට්‍රි එක ඇතුලට දාන ෆිලින් එක විතරයි. මෙහෙම පේස්ට්‍රි වලට කියන්නේ පෆ් පේස්ට්‍රි කියල. පෆ් පේස්ට්‍රි එක හදන එක මහා පන යන වැඩක්. මම එකම එක පාරක් හදල තියෙනවා ලංකාවේදී, ඒ මම කැම්පස් යන දවස්වල. අම්මේ එදා පේස්ට්‍රි එක හොඳට ආවත් ඒක හදල මගේ පණ ගියා. ඉතින් මෙහෙ නම් රෙඩි මේඩ් පෆ් පේස්ට්‍රි ශීට් කඩෙන් ගන්න තියෙනවා. මට කවුද කිව්වා ලංකාවෙත් සුපර් මාකට් වල දැන් තියෙනවා කියල. ඉතින් අඬුව තියෙද්දී මොකටද අත පුච්චගන්නේ ළමයි? ඔය කීල්ස් එකක් හරි කාගිල්ස් එකක හරි ෆ්රෝසන් ෆුඩ් සෙක්ෂන් එකට ගිහින් බලන්න මේ ශීට් තියෙනවද කියල. ඕනෙම නම් ඉතින් ඔච්චර අමාරුවක් තියෙනවා නම් පෆ් පේස්ට්‍රි හදන හැටිත් පස්සේ දාන්නම් :)

ඕන කරන දේවල් :
තම්බල කොටු කොටු වෙන්න කපා ගත්ත එළවලු කෝප්ප 1 (ඕනෙම එළවලු වර්ගයක් ගන්න පුළුවනි. අල, කැරට්, ග්‍රීන් පීස්, ගෝවා මල්, බෝංචි ... ඕනෙම දෙයක්)
දිගට කපා ගත්ත ලොකු ලුණු ගෙඩි 2
කපාගත්ත තක්කාලි ගෙඩි 2
අවු මිරිස් කරල් 2 ක් (තම තමන් මිරිස් කන හැටියට මේක අඩු වැඩි කරගන්න)

කොත්තමල්ලි කුඩු මේස හැඳි 1
සුදුරු කුඩු තේ හැඳි 1
මිරිස් කුඩු තේ හැඳි 1 (මේකත් තමන්ට ඕනේ හැටියට)
ඉඟුරු සුදු ලුණු සම සමව හොඳට තලලා තේ හැඳි 1
කරපිංචා කොළ ටිකක්
තෙල් මේස හැඳි 1
ඕනේ හැටියට ලුණු


තෙල් ටික රත් කරලා ළූණු තෙම්පරාදු කරගන්න. ඒකටම කරපිංචා, කොත්තමල්ලි කුඩු, සුදුරු කුඩු, සහ මිරිස් කුඩු දාන්න. තත්පර 30 විතර බැදගන්න
ඉඟුරු සුදුලුනු එකතු කරලා විනාඩියක් විතර බැදගන්න
මේකටම තක්කාලි සහ අවුමිරිස් එකතු කරලා මිශ්‍ර වෙනතුරු බදින්න
අන්තිමට තම්බල කපපු එළවලු ටික එකතු කරන්න
රසේ හැටියට ලුණු දාන්න
මේ මිශ්‍රණය පියන නොවසා විනාඩි 5 ක් විතර උයාගන්න ඕනේ. අන්තිම රිසල්ට් එක ටිකක් තෙතමයක් සහිත, ඒත් දියාරු නැති එකක් වෙන්න ඕනේ.

දැක්ක නේද ලස්සනට හරි ගානට එළවලු කොටු කපල තියෙන හැටි :D

දැන් ඉතින් ඔච්චරයි. ඕක හදන්න පටන් ගන්න කොට මම අර ක්ෂණික පේස්ට්‍රි ශීට් 2 ක් ෆ්රීසර් එකෙන් එලියට අරන් තියනවා සීතල යන්න. මේවා ගොඩක්ම සීතල ගියත් බැහැ - එතකොට නිකම් චොර ගතියක් එනවා. ඉතින් මේක හදල ඉවර වෙද්දී ගානට පේස්ට්‍රි ශීට් ඩිෆ්රොස්ට් වෙනවා. ඊට පස්සේ මේ හදාගත්ත පිරවුම මැද්දට තියල තමන්ට කැමති හැඩේකට පේස්ට්‍රි කපාගෙන සෙල්සියස් 200 කට රත් කරපු අවන් එකක විනාඩි 25 විතර බේක් කරගන්න තමයි තියෙන්නේ...
ආ තව එකක් පිරවුම තියල නවද්දී දාල වල මම නම් බිත්තර කහ මද ගානවා ඇලවෙන්න. ඒ බිත්තරේම සුදු මද අවන් එකට දාන්න කලින්, නවාගත්ත පේස්ට්‍රි මතු පිට ගෑවාම ලස්සන නිමාවක් එනවා.

දැන් ඕනෙනම් ඔය මිශ්‍රණය හදල එකත් එක්කම තම්බල කපපු බිත්තර පලු උනත් තියන්න පුළුවනි. ඒ වගේම මේවා බේක් කරද්දී තෙල් කඩදාසියක් බේකින් ට්‍රේ එකේ තියල ඒක උඩ තියල බේක් කරන්න අමතක කරන්නත් එපා....