Pages

Friday, May 31, 2013

සිහසුන් ක්‍රීඩා හෙවත් A Game of Thrones නොහොත් ඇබ්බැහි වීම


කාලයෙන් කාලයට විවිධ දේ වලට 'ඇබ්බැහි වීම්' ඇතිවේ. රුපවාහිනී කතා මාලා, පොත්, පරිගණක ක්‍රීඩා, සංගීතය, ඡායාරුපකරණය, ඇතුළු බොහෝ ඇබ්බැහිකම් ජීවිතය රසවත් කරයි...

Game of Thrones යනු මේ දින වල රුපවාහිනියේ ප්‍රචාරය වෙන මාගේ නවතම ඇබ්බැහිවීමයි! එය George R. R. Martin විසින් ලියන පොත් මාලාව මත පදනම් වී ඇත්තක්.

රුපවාහිනී කතා වෘතාන්තය කෙතරම් විශිෂ්ට වුවත්, පොත් මාලාව ට මම වඩාත් කැමැත්තෙමි. රුපවාහිනියේ දිවෙන රුප රාමු සිත් ඇද ගනී. එසේ වුවත් ප්‍රධාන චරිත කිහිපයක්ම රූපවාහිනියට වඩා වෙනස් ව පොත් වල දිස්වේ. රුපවාහිනි කතා මාලාවේ සමහරක් සුදු කළු වශයෙන් දිස්වෙන චරිත ප්‍රත්‍යර්පණය ට වඩා පොත් වලින් හෙළිවන අළු පාට චරිත නිරුපණය ට මම ඇලුම් කරනවා!

හිමෙන්, ගින්නෙන් ගැයෙන ගීතය 

රුපවාහිනි කතා මාලාවේ නම Game of Thrones වුවත්, A Game of Thrones යනු පොත් පෙලේ පලවෙනි පොත ය. සැබෑවටම පොත් පෙලේ නම හිමෙන්, ගින්නෙන් ගැයෙන ගීතය හෙවත් A Song of Ice & Fire ය.
දැනට පොත් පහක් ලියවී ඇති මේ කතාව අයිති වන්නේ මනස්සෘෂ්ටික මහා කාව්‍ය හෙවත් Epic Fantasy ගණයේ සාහිත්‍යයට බව කිව හැකිය. එසේ වුවත්,කල්පිතය, යතාර්ථය, දේශපාලන න්‍යායය, යුද්ධෝපක්‍රම, මිනිස් බැඳීම්, සියල්ලක්ම ඇති මෙවන් පොත් මාලාවක් මා හට නම් හමුවී නැහැ!
සත්‍ය වශයෙන්ම මේ තරමටම සිත් ඇද ගැන්මට හැකි වූ වෙනත් පොත් මාලාවක් වෙතොත් ඒ Lord of the Rings by Tolkein, හෝ Dark Tower by Stephen King විය යුතුයි.

ඇබ්බැහි වීමේ බරපතල කම කෙසේද යත් දැනට නිකුත් වී ඇති පොත් පහම එක හුස්මට කියවා දැමීමට ගතවුයේ මාස දෙකයි හමාරක් පමණි!
සීතල සිසිර රාත්‍රීන් කීයක නම් කෝපි කෝප්පයක් සහ ඩාක් චොක්ලට් පෙත්තක් සමඟින් හිමෙන් ගින්නෙන් ගැයෙන ගී රස වින්දාද?! කතුවරයා කියන හැටියට තව පොත් දෙකක් නිකුත් වන්නට ඇත. එහෙත් ඊළඟ පොත එනතුරු 2014 වන තෙක් බලා හිඳින්නට වී තිබේ :( 


[Warning : Spoilers ahead...]

පස් වන පොත වන 'මකර නර්තන' අවසන් වුවේ මගේ ප්‍රියතම චරිතය පිහි ඇනුම් කන අවස්ථාවෙන්. මා සිතනා අන්දමට ඔහු මිය ගියොත් කතාව අවසන් වන තරමට ඔහු වැදගත් චරිතයක්...ඉදින් ඔහු මකර නර්තනයේ පිහි ඇනුම් කා මිය යාවි කියා කිසි සේත්ම හිතාගන්නට බැහැ...


මුල් පොත් වල ඔහු එතරම් කැපී පෙනෙන චරිතයක් නොවුනත් ඔහු කාගේ කවුරුද කියා සැමවිටම තිබුනේ යම් අබිරහසක්. පොත් පෙළේ බොහෝ පාඨකයන් අතර ජනප්‍රියම මතයක් වන්නේ ඔහු නෙඩ් ස්ටාක් ගේ දරුවා නොව බෑණා බවයි.

ඇත්තෙන්ම ජොන් ලියානා සහ රේගාර් ගේ දරුවෙක් ද?

“I was with her when she died,” Ned reminded the king. “She wanted to come home, to rest beside Brandon and Father.” He could still hear her at times. Promise me, she had cried, in a room that smelled of blood and roses. Promise me, Ned. The fever had taken her strength and her voice had been faint as a whisper, but when he gave his word, the fear had gone out of his sister’s eyes.
---Game of Thrones, pg. 43
නෙඩ් ජොන් තමාගේ අවජාතක දරුවෙක් ලෙස හදාගත්තා මිස, කිසි දිනක ජොන් ගේ මව කවුද යයි පැවසුවේ නැත. සාධාරණ මිනිසෙක් වූ නෙඩ් දරුවෙක්ට තම මව ගැන තොරතුරු හෙළි නොකරන්නේ ඇයි?
Image from here

ලියානා සිය මරණ මංචකයේ නෙඩ් ගෙන් ගත් පොරොන්දුව තමන්ගේ බිළිඳු දරුවා හදා ගන්නා ලෙස නොවිය හැකිද? ජොන් රෙගාර් ගේ දරුවෙකු බව පිටට ගියහොත් අනික් රෙගාර් ගේ දරුවන් සේම ඔහුවත් මරා දමනු ප්‍රත්‍යක්ෂයකි. අවජාතකයකු බිහි කිරීමෙන් තම නම්බුවට වූ කැළල ද දරාගෙන ජොන් තම දරුවෙක් ලෙසින් නෙඩ් ඇති දැඩි කරන්නේ ඒ නිසා විය හැකි නොවේද?
 
මතුපිටින් බලද්දී ලියානා තමන් සිය පියාත් සහෝදරයා ත් සමඟ මිහිදන් කරවන ලෙස නෙඩ් පොරොන්දු කර ගන්නාක් හැටියට පෙනී ගියත්, ඒ ඉල්ලීම බරපතල ඉල්ලීමක් නොවේ. ඒ පොරොන්දුව දුන් විට ලියානාගේ දෙනෙතේ බිය පහවී යයි.
මිහිදන් කරවන තැන ගැන ඇය එතරම් බිය වීමේ තේරුමක් නැත.  අනික, මේ අබිරහස් පොරොන්දුව ගැන නෙඩ් ට පොතේ කිහිප විටක්ම මතක් වේ. එහි ඇති වැදගත් කම ගැන ඉන් ඉඟියක් සැපයෙනවා නොවේද?


A blue flower grew from a chink in a wall of ice, and filled the air with sweetness.
--Clash of Kings, pg. 707
Image from here:
 මේ ඩනේරිස් 'නොමියෙන මන්දිර' යේ හිදී දකින (සිහින?) දර්ශන වලින් එකක්.
නිල් රෝස ලියානාගේ ප්‍රියතම මල් බව කිහිප තැනක සඳහන්. අභාවයට යමින් තිබුණු 'රාත්‍රී සෙබළ මුල' ට නව පණක් දෙමින් උතුරේ මහා ප්‍රාකාරය ශක්තිමත් කරන්නේ ජොන්...
 
 
“King,” croaked the raven. The bird flapped across the air to land on Mormont’s shoulder. “King,” it said again, strutting back and forth.
“He likes that word,” Jon said, smiling.
“An easy word to say. An easy word to like.”
“King,” the bird said again.
“I think he means for you to have a crown, my lord.”
“The realm has three kings already, and that’s two too many for my liking.” Mormont striked the raven under the beak with his finger, but all the while his eyes never left Jon Snow.
--Clash of Kings, pg. 105

මොර්මොන්ට් ගේ කපුටා මේ ඉඟි කරන්නේ ජොන් ගැන විය හැකිද? ඇත්තෙන්ම ජොන් රේගාර් ගේ දරුවෙකු නම් සිහසුන හිමි ඔහුට ය. මොර්මොන්ට් ගේ කපුටා ගැන මට තවත් ප්‍රශ්න ඇත... බ්‍රෑන් 'හරිත දකින්නා' හෙවත් greenseer වෙත යන කොටස් වල තිබු දේ අනුව මොර්මොන්ට් ගේ කපුටා සහ 'අරණෙහි දරුවන්' අතර සම්භන්දයක් ඇද්දැයි සිතේ.

කෙසේ වෙතත් ලෙහා ගන්නට අමාරු ගැටලුව රෙගාර් සහ ලියානා ය. රොබර්ට් හැරෙන්නට රේගාර් ගැන නරකක් කියන්නෙකු පොත් වල නැත. නෙඩ් පවා රේගාර් ට දොසක් කියන්නේ නැත. එසේ නම් රේගාර් බලහත්කාරයෙන් ලියානා පැහැර ගත කතාව සක සහිත නොවේද?
රේගාර්, ලියානා සහ ජොන් අතර සම්බන්දය ට Azor Ahai පුරාවුර්තය සමඟද සම්භන්දයක් ඇතැයි සිතේ...
Image from here

මකරුන්ගෙන් පැවත එන රෙගාර් 'ගින්දර' නම් හිමෙන් වැසී ගිය උතුරෙන් පැවත එන ලියානා 'හිම' නම්, ඔවුන් දෙදෙනා එක්වූ විට ගැයෙන්නේ  හිමෙන් ගින්නෙන් ගැයෙන ගීතය නොවේද?
 
“He has a song,” the man replied. “He is the prince that was promised, and his is the song of ice and fire.”

Wednesday, May 15, 2013

මගුල් කෑම! : 2 ..වෙන්ඩ මනමාලිලාට වැදගත් අනම් මනම් ටිකක්

<<මෙන්න 1 කොටස

කොහේද?

දිනේ තෝරගත්තට පස්සේ තියෙන්නේ වෙඩින් එක ගන්ඩ තැනක් බුක් කරන එක.
එතෙන්දි ඔයාල අමුත්තෝ කී දෙනෙක්ට ආරාධනා කරනවද කියල දළ වශයෙන් අදහසක් තියෙන්ඩ ඕනේ. මොකද ගොඩක් හෝල් වල අවම සහ උපරිම අමුත්තෝ ගානක් තියෙනවා.

මම නම් පුද්ගලිකව උඩ තට්ටුවේ තියෙන හෝල් වලට කැමති නැහැ. මොකද ඒවා වල සාමාන්යෙන් සීලින් එක පහතයි. එතකොට පොඩ්ඩක් හිරවෙච්ච ගතියක් එන්ඩ පුළුවන්. උසට සීලින් එකක් තියෙන කොට වැඩිය ලස්සනයි... අනිත් එක පඩි නැග නැග bridal retinue එක එද්දී ඒකෙ ලස්සනත් යනවා.

හෝල් එක බුක් කරද්දී එතන පිහිටීම ගැනත් පොඩ්ඩක් හිතන්න. ඒ කිව්වේ කොහෙද තියෙන්නේ කියලා. මනමාලිගේ ගෙදර ඉඳන් යන්න ළඟ වෙන තරමට හොඳයි. ඒ වගේම එන මිනිස්සුන්ට පහසු නම් තවත් හොඳයි. මොකද මිනිස්සු අපේ වෙඩින් එකට එන්නේ දහසකුත් එකක් කරදර මැද්දේ. එහෙව් එකේ හොයාගන්න අමාරු, දුර බැහැර තැනක තියෙන හෝල් තෝර නොගන්න තරමට තමයි හොඳ.


අනික් එක තමයි වියදම :) මේකට තමයි ඉතින් වැඩිම වියදම යන්නේ. ගොඩක් වෙලාවට කෑම මෙනු දෙක තුනක් අතරින් තොරගන්ඩ තියෙන්නේ. ඉතින් තමන් ට කැමති විදිහට මෙනු එකේ දෙන කෑම ජාති බලල අතේ තියෙන ගානට එකක් තෝරාගන්න පුළුවන්. හැම හොටෙල් එකක්ම වගේ ඔය වෙඩින් පැකේජ් ගැන විස්තර ඊ මේල් වලින් එවනවා...
සාමාන්‍යෙන් නම් ඔය පැකේජ් එකට එදා උදේට කට්ටියට අඳින්න dressing room එකක් හෝ දෙකක්, එදා රෑට කපල් එකට ඉන්න රූම් එකක්, පහුවෙනිදට උදේ කෑම එහෙම ඇතුල් වෙනවා.

අන්දන වැඩේ 
 ගෑණු ළමයට නම් ඉතින් මේක තමයි ගොඩක්ම වැදගත්!
එක අතකට ඒකෙත් වැරැද්දක් නැහැ. මොකද ඉතින් එදාට හැමෝම බලන්නේ මනමාලි දිහා නේ. කවුද අර අසරණ මනමාලය දිහා බලන්නේ?! :D
හැබැයි කට්ටිය ඔය මේක් අප් දාන වැඩෙන් ඇත්තටම 'ඇන්දෙන' වෙලාවලුත් තියෙනවා!


ඉතින් අන්දන කෙනා බුක් කරද්දීත් කීප දෙනෙක් හම්බ වෙලා කතා කරලා බුක් කරන්න පුළුවන්. සමහර සැලොන් නම් ඒකත් පැකේජ් විදිහට කරනවා. ඒ කියන්නේ hair & makeup, ඇඳුම් මහන එක, මල් බොකේ ඔක්කොම කරනවා. එහෙම තනි එක්කෙනාම කරන කොට ලේසියි.
හැබැයි මගේ නම් ඔය තුන කරේ වෙන වෙනම තුන් දෙනෙක්. එතකොට ඉතින් ටිකක් සංකීර්ණයි. ඒත් මම එහෙම කරේ මගේ hair & makeup කරපු එක්කෙනා අනිත් දේවල් මුකුත් කරන්නේ නැති නිසා.

එයාව තොරගන්ඩ කොට එයා කලින් අන්දපු මනමාලිලා ව පොඩ්ඩක් බලන්න.
සමහරු මේක් අප් තලි තලි ගාල කට්ටිය අඳුර ගන්නත් බැරි කරනවා. මගුල් දවසේ මනමාලිගේ හමේ පාටයි, පස්සේ හමේ පාටයි අහසට පොලව වගේ! අනේ මන්ද ඔය හමේ පාට සුදු කරන එකට මම නම් ආස නැහැ. ඇයි වදේ තමන්ගේ මගුල් දවසේ තමන් වෙනමම අමුතු කෙනෙක් වෙන්ඩ ඕනෙද? දක්ෂ රුපලාවන්‍ය ශිල්පියා කරන්නේ මනමාලිගේ ස්වභාවික ලස්සන මතු කරන එක! නැත්නම් වෙස් මුණක් දාගත්ත වගේ පාට උලන එක නෙවෙයි...

ඒවගේම පොඩ්ඩක් කතා කරලා බලන්න අන්දන එක්කෙනා එදා දවසේ ගෙදරට හරි හෝල් එකට හරි එනවද නැත්නම් මනමාලි එයාගේ සැලෝන් එකට එන්න ඕනෙද කියල.
එයා අපේ තැනකට එනවා නම් ලේසියි... නැත්නම් මනමාලි ගම්පහ, සැලුන් එක නුගේගොඩ, වෙඩින්  එක කොල්ලුපිටියේ වගේ උනොත් මහා වදයක් නේ. :D
මොකද මනමාලි විතරක් නෙවෙයි දෙවෙනි මනමාලිලා සහ මල් කුමරියෝ කට්ටියත් එක්කන් යන්න ඕනෙනේ.

අනේ ඉතින් මගේ එක්කෙනා නම් හෝල් එකකට එන්නම් කිව්වා. ඉතින් අර කරදරකාරී 'පිටත් වෙන නැකත' මහා පාන්දර තිබුන නිසා මම කරේ ඒකට විනාඩි පාලොහකට විතර කලින් නැගිටලා යන්තම් මුණ කට හෝදගෙන ගෙදරින් පිටත් වෙලා... හොටෙල් එකේ dressing room එකට වෙලා ඉඳන් කාල බීල නාගෙන අන්දන කට්ටිය එනකම් හිටපු එකයි. :)

ඇඳුම
ගොඩක් අය අඳින්නේ පහතරට ක්‍රමේට වේල් දාල ඉන්දියන් සාරිය හරි ඔසරිය හරි නේ. ඉතින් ඕකට සාරිය ගන්න කලින් අර අන්දන එක්කෙනා එක්ක පොඩ්ඩක් කතා කරලා බලන එක හොඳයි. මොකද හැමෝන්ටම හැම දෙයක්ම ගැලපෙන්නේ නැහැනේ...
 සුදු පාටේ උනත් එක එක ප්‍රභේද තියෙනවනේ. ඒ වගේම සමහර අයට රිදී පාට work එකක් ගැලපෙනවා. සමහර අයට හරියන්නේ රත්තරන් පාට work එකක්...

මම ඇන්දේ රත්තරන් පාටින් වැඩ දාපු off white සාරියක්.

ඒ වගේම සාරියේ material එකත් වෙනස් වෙනවා. පහතරට ක්‍රමේට අඳිනවා නම් chiffon රෙද්ද තමයි හොඳ. ඒක පිම්බෙන්නේ නැති ලස්සනට ඇලිල තියෙන නිසා. ඔසරිය උනත් ඒකෙන් අඳින්න පුළුවන්.
හැබැයි raw silk සාරි නම් හරියන්නේ ඔසරියට විතරයි. මොකද ඒක ටිකක් පිම්බෙන්න බලන නිසා. ඇත්තටම raw silk සාරි හරිම ලස්සනයි. ගොඩක්‌ ග්‍රෑන්ඩ් පෙනුමකුත් තියෙනවා. ඒ වගේම ගණනුත් එක්ක. ඒත් පිම්බෙන ගතිය නිසා laser chiffon කියන ජාතියේ සාරියක් තමයි මම තොර ගත්තේ.

ආසාවෙන් අතගාල තියල ආපු රෝ සිල්ක් සාරිය!

ඇත්තටම මම මුලින්ම හිතුවේ ලේස් සාරියක් ගන්න. ඒත් දැන් ලේස් සාරි එන්නේ නැතිලු. කඩ වල තිබුනෙත් නැහැ. ඉතින් එහෙම උනොත් ලෙස් පීස් වෙනමත්, ප්ලේන් සාරි රෙද්දක් වෙනමත් අරන් කපලා සාරියක් හදන්න වෙනවා කියල මහන එක්කෙනා කිව්වා. ඒත් ඒක හරිම සංකීරණ සහ මිල අධික වැඩක් වෙයි කියල හිතුන නිසා ඒ අදහස අත ඇරලා දැම්ම.

පිට කොටුවේ ලේස්! :)

හැබැයි එකක් තියෙනවා. ඔයාල සාරි ගන්න යන කොට අර beautician ලව එක්ක යනවා නම් පොඩ්ඩක් ප්‍රවේසම් වෙන්න. මොකද එයාල එයාලගේ අඳුනන කඩවලට එක්ක ගිහින් මොකක් හරි එකක් ඇඟේ ගහන්න ඉඩ තියෙන නිසා.

මම නම් සාරිය ගන්න ගියේ අම්මයි තාත්තයි එක්ක :) මගේ beautician සහ ඇඳුම් මහපු එක්කෙනා එන්ඩ ඕනේ කිව්වෙත් නැහැ...මම කරේ එයාලගෙන් සාරි ජාතියි, පාටයි පොඩ්ඩක් අහගෙන පිට කොටුවට ගිහින් මට ආස හිතුන සාරිය තෝර ගත්ත එකයි :)

ඊ ගාවට සාරි ජැකට් මහද්දී හරියට ඇඟේ ගානටම තියෙන්ඩ ඒක තියෙන්න ඕනේ. ඉතින් bridal jacket මහද්දී පොඩ්ඩක් විශේෂත්වයක් කරන නිසා සාමාන්‍ය සාරි ජැකට් වලට වඩා ගණන් යනවා. අනිත් එක සාරියේ බ්ලවුස් පීස් එකෙන් නෙවෙයි මහන්නෙත්.
රෝ සිල්ක් වලින් වේල් බෝන් දාල මැහුවම ලස්සනයි. හැබැයි ඕකට හොඳ තත්වයේ රෝ සිල්ක් හම්බුනොත් හොඳයි. මට එහෙම හොඳම රෙද්ද කියල  කඩ කාරය දුන්නත් පස්සේ බෙයිජිං වල සිල්ක් ෆැක්ටරි එකකදී තිබුන රෝ සිල්ක් රෙදි අල්ලලා බැලුවම තේරුනා මම අරන් තිබුනේ හොඳම රෙද්ද නෙවෙයි කියල :(
 හොඳ වෙලාවට මගේ ජැකට් එකට ඒක ගානක් උනේ නැහැ. ඒත් දෙවෙනි මනමාලි කෙනෙක්ගේ ජැකට් එක ප්‍රෙස් කරද්දී පොඩ්ඩක් රැල්ලක් හිටියා රෙද්ද නිකන් උණු උනා වගේ උන නිසා.

මනමාලි ල චාම් වෙන තරමට මට ලස්සනයි. ඉතින් ගොඩක් සුකුරුත්තන් මෝස්‌තර තෝර ගන්න එපා... අනිත් එක තමන් දන්නවනේ තමන්ගේ ඇඟ මොන විදිහද කියල. ටිකක් ඇඟ තියෙන කෙනෙක්ට ගොඩක් ගැඹුරට කර කපන එක වගේම, බඩ  තියෙන කෙනෙක් ටයර් සංස්ථාව වගේ අඳින එකත් හරි නැහැ කියලයි මට හිතෙන්නේ. අනික් එක කොහොමත් 'Bride' කියන්නේ මෝස්‌තර නිරූපිකාවක් නෙවෙයි නේ :)


හ්ම්ම් තව දේවල් ලියන්න තියෙනවා...ඒවා පස්සේ... :)

Monday, May 6, 2013

මගුල් කෑම! ..වෙන්ඩ මනමාලිලාට වැදගත් අනම් මනම් ටිකක් : 1

මගුලක් ගන්නවා කියන්නේ පණ යන වැඩක්! කසාද බැඳපු අය දන්නවා ඇති නේ... :D

හැබැයි හරියට ප්ලෑන් කරලා එදා දවස ලස්සනට වැඩේ කෙරුනහම උණු මහන්සිය කමක් නැහැ කියලත් හිතෙනවා.

ඉතින් මාස ගානක් තිස්සේ මගුල් ගෙදර වැඩ නිසා කෑව කටු ගැන හිතලා මට හිතුනා අනාගත මනමාලිලාට වැදගත් වෙන දේවල් ටිකක් ලියන්න.

කවද්ද?

ඔයාල බඳින්න ඉන්නවනම් පළවෙනි වැඩේ දිනයක් දා ගන්න එක. කේන්දර අනුව නැකත් බලල නම් එහෙමයි, නැත්නම් පහසු විදිහට දිනේ ගන්නත් පුළුවනි.


නැකත්
පොඩ්ඩක් ඔය නැකත් හදනකොට බලන්න දීල තියෙන නැකත් වෙලා එක්ක ඔයාලගේ වැඩ ටික කරගන්න වෙලා ඇද්ද කියල. රෙජිස්ට්‍රේෂන් එක සමහරු කලින් ගන්නව නේ. තවත් සමහරු මගුල් දවසේමයි රෙජිස්ටර් කරන්නේ. එහෙම මගුල් දවසෙම කරනවා නම් ඒකටත් පැය කාලක් වත් යනවා කියල හිතේ තියාගන්න...හැබැයි නැකත අනුව ඒ වෙලාව වෙනස් වෙනවා. ඒ කියන්නේ පෝරුවෙන් පස්සේ තමයි රෙජිස්ටර් කරන එක කරන්නේ. එතකොට පෝරුවෙන් බහින නැකතයි, රෙජිස්ටර් කරන නැකතයි අතර ගොඩක් වෙලා උඩ බලාගෙන නිකන් ඉන්න වෙන විදිහට හදා ගන්ඩ එපා.
මොකද එතකොට උත්සවේ වෙලාව නිරාපරාදේ නාස්ති වෙනවා. ආපු අමුත්තන්ටත් කම්මැලියි...
පෝරුවෙන් බැහැල පැය බාගයක් වගේ තියෙනවා නම් රෙජිස්ටර් කරන නැකතට, ඒ වෙලාවේ පුළුවන් කිරිබත්, කේක් කපනවා නම් කපන්න, ඒ වගේම ෂැම්පෙන් වක්කරන ඒවා, කිරි කල වගේ ඒවා (කරනවා නම්) කරන්න...

මෙන්න මේවා තමයි සාමාන්‍යෙන් මනමාලිට අදාළ නැකත්:
  1. නිවසින් පිටත් වීම
  2. තැල්ල දැමීම (තැල්ලක් දානවා නම් විතරයි...මම නම් දැම්මේ නැහැ)
  3. පෝරුව
  4. රෙජිස්ට්‍රේෂන් එක
  5. පිටත් වීම


ෆොටෝ ගන්නත් වෙලාවක් යනවා කියල අමතක කරන්ඩ එපා. ෆොටෝග්‍රෆර් ල සාමාන්‍යෙන් පැය 3 ක් විතර ඉල්ලනවා මේ වැඩේට. එතකොට ඔයාගේ පෝරුව තියෙන්නේ 10 ට නම්, උදේ 6.30 ට විතර ෆොටෝ ශුට් එක පටන් ගනීවී.
ඒ කියන්නේ ඔයාලා ලෑස්ති වෙලා ඉවර වෙලා ඉන්ඩ ඕන 6.30 ට වත්.

ඒවගේම පෝරුවට වෙලා දානකොට පුළුවන් තරම් අඩුම වෙලාවක් දාගන්න බලන්න. විනාඩි විස්සක් තමයි දෙන අවම වෙලාව. ඊට එහා වෙලා දානවා නම් පරිස්සමින්...විශේෂෙන් මනමාලිට තමයි මේකේ අමාරුව. ගොඩක් වෙලා සාරි ඇඳන් මේක අප් පිටින් හීල්ස් දාගෙන ෆොටෝග්‍රෆර් ගේ ලයිට් අස්සේ හිටගෙන ඉන්න එක. මොකද ඔතෙන්ට එන්නේ පැය තුනක විතර ෆොටෝ ශුට් එකක් ඉවර වෙලා...



හොඳ වෙලාවට අපිට නම් විනාඩි 20 මයි තිබුනේ... ෆොටෝ ගන්ඩ හොටෙල් එකෙන් පිට ගියේ නැති නිසාත්, මාර්තු මාසේ උනත් දෙවියෝ බැලුව වගේ එදා දවසේ අව්ව නොතිබුණු නිසාත්, ෆොටෝ ශුට් එකෙන් පස්සේ මට පැය බාගයක් විතර හොඳ රෙස්ට් එකේ කකා බිබී රූම් එකට වෙලා ඉන්න තිබුණු නිසාත්...එවෙලේ මට කිසිම අමාරුවක් දැනුණේ නැහැ :)

නැකත් කොලේ
 සිරිත හැටියට නම් නැකත් බලන්නේ මනමාලයා. එයාලා නැකත් බලල 'නැකත් කොලේ' කියල එකක් හදාගෙන මනමාලිගේ ගෙදර එනවා නෑදෑයෝ කීප දෙනෙක් එක්ක. ඇවිත් නැකත් කොලේ දෙනවා.

"XX වන මම ඉහත සඳහන් ඔබ දෙපළගේ දයාබර දියණියන් වන YY මෙනෙවිය සමඟ ආර්ය චාරිත්‍රානුකුලව සරණ බන්ධනයට ඇතුලත් වීමට අවශ්‍ය බන්ධුන් විසින් ගිවසගත් හෙයින් ඒ සඳහා යෙදෙන සුභාසිරි නැකත් නෑසියන් සභා මැද ආසිරි පෙරටු කොට ගෙන මෙසේ පිළිගන්වමි ..." කියල එහෙම පටන් අරන්...නැකත් ටිකත් දාල අන්තිමට "මෙයට බන්ධුත්වාපේක්ෂක XX" කියල නම් ගම් පිටින් ලස්සනට ලියල එහෙම තියෙනවා...
(ඕක දුන්නට පස්සේ ඉතින් කොල්ල හැමෝම ඉස්සරහ බඳින්න පොරොන්දු උණා වගේ තමාලු! :D)

අපෙ නැකත් කොලේ!

අපෙත් එහෙම කොලේ අරං නම් ආවා...හැබැයි අපි කීප තැනකින් මුලින් නැකත් බලල අපිට ලේසි නැකත් තෝරාගෙන තමයි කොලේ හැදුවේ :D

ඕක ඉතින් එහෙම කරන්ඩ ඕනෙමයි කියල නීතියක් නැහැ. ඕනැ නම් කරන්ඩ...!


අදට මේ ඇති...තව මතක් වෙන හැටියට ඉස්සරහට ලියන්නම්!