Pages

Sunday, February 26, 2012

සුන්දර ටැස්මේනියාව හෙවත් ආදරණීය ටැසී : 2

<<පලවෙනි කොටස මෙතනින්
 
තුන්වෙනි දවස
එදා උදෙන්ම අපි නාල කාල පිටත් උනේ  ලෝන්සේස්ටන් කියන පැත්තට යන්න. දැන් ඔය වෙද්දී අපි හිටියේ නැගෙනහිර වෙරළ පැත්තෙනේ. ඒ නවාතැනට සමුදීල අපි දැන් යන ලෝන්සෙස්ටන් තියෙන්නේ උතුරු මැද වගේ. මේ යටින් තියෙන්නේ අතරමැද බල බල ගිය මිදිවතු, චෙරි වතු, ස්ට්‍රෝබෙරි වතු වල එහෙම පින්තුර.




ස්ට්‍රෝබෙරි වත්තෙන් රසම රස නැවුම් ස්ට්‍රෝබෙරි ජෑම්, චොකලට් ආලේපිත ස්ට්‍රෝබෙරි ඩ්‍රෝපස්, ස්ට්‍රෝබෙරි සෝස් (අයිස්ක්‍රීම් කද්දී දාගෙන කන්න) එහෙම ගන්නත් අමතක කලේ නැහැ. ඔහොම ෆාම් වලින් ගන්න ජෑම් වල එහෙම සුපර්මාකට් වලින් ගන්න ජෑම් වලට වඩා අලුත් නැවුම් රහක් තියෙනවා. කොහොම හරි මම ඔය ගත්ත ජෑම් බෝතලයක් ලංකාවටත් අරන් ගියා. ස්ට්‍රෝබෙරි වත්තේ එහෙම උනාට මිදී වතුවල නම් මිදි ගන්න බැහැ :D. ඒවායේ තියෙන්නේ වයින්. වයින් ඕනෙනම් මිලදී ගන්න වගේම නොමිලේ රහ බලන්නත් පුළුවනි.

ඇත්තටම ලෝන්සෙස්ටන් දැක්කම අපේ නුවර එලිය වගේ කියල මට හිතුනේ. පරණ කොලොනියල් ගොඩනැගිලි වලින් සමන්විත 'Old world charm' තියෙන නගරයක්. එහෙ නවාතැනට ගිහින් මහන්සි හෙම ඇරගෙන අපි ගියේ 'කැටරක්ට් දුර්ගය' බලන්න. ඒක මොකද්ද කියල අහන්න එපා දැන් :D. නමේම තියෙනවනේ. ඒක දුර්ගයක් :P. මේ තියෙන්නේ...

 අපි නැවතිලා හිටපු තැන රෙසේප්ෂනිස්ට් අක්කා එක්ක ටිකක් කතාකරපු පාර, එයා ඉතාලියේ ඉපදිලා ඩොක්ටරේට් එකකුත් තියෙන කෙනෙක්. රට රටවල ඇවිදින්න ගොඩක් ආසයිලු. ලංකාවටත් ගිහින් තියේලු - හැබැයි දවස් දෙක තුනකට. අම්බලන්ගොඩ ගැනත් කිව්වා. ඉතින් එයා ඔහොම ඇවිදිද්දී ටස්මෙනියාවට ආපු පාර එහෙ ලස්සන නිස්කලංක බව නිසා එහෙ නවතින්න හිතුනලු.
එදා රෑට කෑම කන්න තැන කිව්වෙත් එයා තමයි. ඇත්තටම ගොඩක් රහ බර්ගර්ස් තියෙන තැනක් නිසා ඔන්න ඔයාල ටැසි ගියත් ඒකට අනිවාර්යෙන්ම යන්න. නම තමා : Burger got Soul. මම දැනට කාල තියෙන රසම බර්ගර් එක කෑවේ එහෙන්.

හතර වෙනි දවස
ලෝන්සේස්ටන් වල තියෙනවා හොලිබෑන්ක් කියල වනාන්තර ප්‍රදේශයක්. අපි හතරවෙනිද ගියේ එහෙට. උසම උස ගස් වැල් පිරිච්ච, ඒ ගස් අතරින් දොළ පාරවල් එහෙම ගලන ලස්සන පැත්තක් හොලිබෑන්ක්. හැබැයි අපි එහෙ ගියේ ගස් වැල් බලන්න නම් නෙවෙයි...
අපි එහෙ ගිහින් කරපු දේ තමයි ඔය යට පින්තුර වල තියෙන්නේ:

ඔය පින්තුරේ පේන කේබල් වල එල්ලිලා තමයි අපි අර ගහෙන් ගහට යන්නේ. කොහොමද ටාර්සන් වගේ නේද? :D
සමහර තැන්වල වේගෙන් ගලන ගඟක් උඩිනුත් යන්න තියෙනවා. උපරිම යෙන් මීටර් 300 වගේ උසකින්. ඔහොම නැවතුම් වේදිකා දෙකක් අතර දුර උපරිම වශයෙන් මීටර් 400 වගේ උනා. මෙතැනදී අපිව කණ්ඩායම් වශයෙන් තමයි එක්ක යන්නේ. ආරක්ෂක ඇඳුම් ඇඳගන්නත් ඕනේ. ඔය ඇඳුම හරියට හාර්නස් එකක් වගේ. ඒකෙ තියෙන කොකු 2 කින් තමයි අර කේබල් එකෙ එල්ලෙන්නේ. මෙතැනදී යන වේගේ පාලනේ කර ගන්නත්, වේදිකාව ලං වෙද්දී safely land කරන්නත් ගයිඩලා කියල දෙනවා. අර උඩ ෆොටෝ එකෙ මැද වාඩි වෙලා ඉන්නේ ඒ එක ගයිඩ් අක්ක කෙනෙක්.

...අන්තිම දවස් දෙක ඊළඟට...

Tuesday, February 7, 2012

සුන්දර ටැස්මේනියාව හෙවත් ආදරණීය ටැසී : 1

ටැස්මේනියාව කියන්නේ ඕස්ට්‍රේලියාවේ එක ප්‍රාන්තයක්. ඔස්ට්‍රේලියාවට යටින් අර චුටි දුපතක් තියෙන්නේ. අන්න ඒක. දල වශයෙන් අපේ ලංකාවේ සයිස් එකමයි. මම යාලුවෝ කට්ටියක් එක්ක ටැසී ගියේ දැනට අවුරුද්දකට කලින්. හොඳටම එන්ජෝය් කරපු ට්‍රිප් එකක් කියන්න පුළුවන්.

ඇත්තටම ටැසී කියන්නේ හරිම ලස්සන පලාතක්. ස්වභාවික සෞන්දර්යය ට කැමති අයට යන්න හොඳම තැනක්. ඒ ක නිකන් ගමක් වගේ නිසා මිනිස්සුත් හරිම ප්‍රසන්න යි.


මෙල්බන් වලට වඩා ටිකක් සීතල වැඩියි. ඒක නිසා යන්න හොඳම කාලේ සමර් ඒක. ඒ කිව්වේ දෙසැම්බර් - ජනවාරි.
මේ පහතින් තියෙන්නේ ටැස්මේනියා මැප් එකත් එක්ක අපි ගිය තැන්. රෑ හිටිය තැන් තමයි නම්බර්ස් දාල තියෙන්නේ.


Image from Google Maps

මෙල්බන් ඉඳන් ටැසී යන්න ක්‍රම දෙකක් තියෙනවා.

  1. ෆෙරි එකෙන් (මුහුදෙන්)
  2. ප්ලේන් එකෙන්.
ෆෙරි එක ගණන් වැඩි නිසා අපි නම් ගියේ ප්ලේන් එකෙන්. අපි ගොඩ බැහැල එයා පෝර්ට් එකෙන්ම කාර් එකක් හයර් කරන් එහෙම්මම නැගෙනහිර පැත්තට ගියා. (1) දාල තියෙන්නේ - බිචිනෝ කියන හරියේ තමයි එදා රෑ. ඊළඟ දවසේ ඒ පැත්තේ ඇවිදලා උතුරු පැත්තට ගියා. රෑ දෙකක් හිටිය ලෝන්සෙස්ටන් වල. ඊට පස්සේ බටහිර පැත්තෙන් ක්රෙඩ්ල් මවුන්ටන් වලත් ඇවිදලා ආයෙත් හෝබාර්ට් වලට. රෑ දෙකක් හෝබාර්ට් වල. කොහොම හරි වටේම කවර කරලා 6 වෙනි දවසේ මෙල්බන් බලා පිටත් උනා. :D

පලවෙනි දවස:
හෝබාර්ට් ගොඩ බැහැපු දවස. මෙදා නම් කරපු දෙයක් නැහැ. මොකද අපේ ෆ්ලයිට් පැය ගානක් පරක්කු වෙලා අපි ටැසී යද්දී පරක්කුයි. ඉතින් ප්ලෑන් ඔක්කොම හබක්. කොහොම හරි බිචිනෝ වලට යා ගත්තා. ඒ පැත්ත - නැගෙනහිර පැත්ත ලස්සන වෙරළ තීර වලට ප්‍රසිද්ධයි.

දෙවෙනි දවස:
උදෙන්ම නැගිටලා පටන් ගත්ත නැගෙනහිර වෙරළ සංචාරේ. ඒ පැත්තේ ලස්සනම තැනක් තමයි වයින් ග්ලාස් බේ.
  •  සුද්දන් මවිත කල නෑම(!)
මුහුදු වෙරලේ කවුරුත් පේන්නත් නැහැ ගොඩ වෙලාවට. ලෝකේ ලස්සනම මුහුදු වෙරළවල් තියෙන රටක කෙනෙක් හැටියට උනත්, මට මේ හරියේ මුහුද ත් ගොඩක් ලස්සනට දැක්ක. විශේෂයෙන් අර කඳුත් එක්ක තියෙන නිසා අපේ රටේ වෙරලවලට වඩා වෙනස්. අමුතුයි. ලංකාවේ වෙරළ තැනිතලා නේ...ඇන්ටාර්ක්ටික් සාගරයේ රැල්ලත් හරීම සීතලයි...හැබැයි ඔය සීතල වතුරෙත් අපි නෑව! අපි නානවා දැකපු ටස්මෙනියාවේ හැදුනු සුද්දෙකුත් පුදුම වෙලා අහනවා 'isn't it warm in Sri Lanka?' කියල:D

වයින් ග්ලාස් බේ හරියේ ගත්තු ෆොටෝ එකක්

  •  අතරමන් වීම
 මට මුලින් මෙල්බන් ආපු දවස් වල, හරි පුදුමයි පාරේ තොටේ මිනිස්සු අඩු යි කියල. ඇයි ඉතින් ලංකාවේ දැකල පුරුදු පාරට බැස්සොත් ගොඩක් මිනිස්සු දැකලානේ. ඔය ඕස්ට්‍රේලියාවේ දෙවෙනියට ජන ගණත්වය තියෙන පැත්තක ඉඳල. හැබැයි ටස්මෙනියාවේ ජනගහනේ වික්ටෝරියා ප්‍රාන්තෙටත් අඩුයි. හරියටම කිව්වොත් ලංකාවේ වර්ග කි මි ට 308.5 යි. වික්ටෝරියා වල 24.39 යි. ටැස්මේනියා වල 7.36 යි ! (source : Wikipediya)
ඉතින් මේ විස්තරේ කිව්වේ ටස්මෙනියාවේ ජන ශුන්‍ය භාවේ ගැන පොඩි අයිඩියා එකක් දෙන්නයි...මොකද කිව්වොත් අපේ එක යාලුවෙක් මේ ජන ශුන්‍ය වෙරළක නැති උන නිසා...මේකත් ඔය වයින් ග්ලාස් බේ පැත්තේ වෙරළ තීර වල රස්තියාදු ගහද්දි උනේ. එතන මුහුදු වෙරළට යන්න ඕනේ නිකම් ලඳු කැලෑව ක් වගේ එකකින් වැහුණු පල්ලම ක් බැහැල. බීච් එකට යද්දී අපි 4 දෙනාම එකට බැස්ස. දැන් ඔතන වැඩේ අර පඳුරු හෙම නිසා මීටර් 5 -6 කට ඉස්සරහින් යන කෙනා පෙන්නේ නැහැ. පොඩි අඩි පාරක් ඔස්සේ තමා ගියේ. ඒක මිස් උනොත් කොහෙන් මතු වේවිද කියන්න බැහැ. ඉතින් අපි බීච් එකේ ටිකක් ඇවිදලා ආයි උඩට නැගල බලද්දී එක්කෙනෙක් මිසින්! දැන් අපි කෝල් ගන්නවා ගන්නවා - සිග්නල් නැහැ. ඇයි ඉතින් ඒ අපි හිටියේ හෙන රිමෝට් පැත්තක. අපිට ඉතින් එක එක ඒවා මතක් වුනා - මෙයා පල්ලමේ පෙරලිලා වැටිලද, ගලක හැපිලද, අරකද මේකද... ඉතින් දැන් පැයක් විතර අපි බලන් ඉන්නවා ඉන්නවා - මෙයා නැහැ. ඔය අතරේ අපි කීප පාරක් ආයෙත් බීච් එකට ගිහින් බැලුව - කාත් කවුරුවත් පේන්නත් නැහැ. නම කියල කෑ ගැහුවා - ඒත් වැඩක් නැහැ... අපි කට්ටිය හොඳටම බය වෙලා දැන් - කියන්න කෙනෙකුත් නැහැ... ඇයි ඉතින් පේන තෙක් මානෙක මොකෙක්වත් ඇත්තේ නැහැ. අන්තිමට අපි කතාවුනා තව විනාඩි 5 ක් බලල ට්‍රිපල් zero කතා කරමු කියල. ඒක තමා මෙහෙ හදිසි අවස්ථා වල අමතන්න තියෙන අංකේ... ඉතින් ඔන්න ඔහොම ඉන්දෙද්දී එතනට ආපු වෑන් එකකින් මෙන්න පොර මතුවුනා! ... එයාට වෙලා තියෙන්නේ ආපහු බීච් එකේ ඉඳන් කන්ද නගිද්දී අර අඩි පාර මග ඇරිලා වෙන කොහෙද පැත්තකින් මතුවෙලා. ඉතින් පාරේ ඔහේ යද්දී හොඳ වෙලාවට ගිය වාහනේකට අත දාල විස්තරේ කිව්වම, හොයල හොයල අමාරුවෙන් තමා අපේ වාහනේ නවත්තපු තැනට ඇවිත් තියෙන්න...!

සංචාරේ ඉතිරි හරිය ඊළඟට  ...

Thursday, February 2, 2012

SOPA, PIPA ගැන දන්නවද?

SOPA සහ PIPA ගැන ටෙඩ් ටෝක්ස් වල තිබුණු මේ කතාව මම හිතනවා හැමෝටම ප්‍රයෝජනවත් වේවි කියල : http://www.ted.com/talks/defend_our_freedom_to_share_or_why_sopa_is_a_bad_idea.html


සම්පුර්නෙන්ම නොවුනත් එහෙන් මෙහෙන් හරි කතාවේ අන්තර්ගතේ සිංහලෙන් දාන්න හිතුව.

මුලින්ම පෙන්වන්නේ බ්රුක්ලින් වල තිබුණු පොඩි බේකරියක ගහල තියෙන බෝඩ් එකක්. බෝඩ් එකෙන් කියන්නේ' No longer accepts edible images from outside sources'.
ඒ කියන්නේ පොඩි ළමයි එක එක පින්තුර ඇඳන් ආවාම බේකරියෙන් ඒ පින්තුරේ අයිසින් ලේයර් එකක ප්‍රින්ට් කරලා දෙනවලු. බර්ත්ඩේ කේක් වලට එහෙම. ඉතින් පොඩි ළමයි සාමන්යෙන් ආසම කරන්නේ මොනාටද? මිකී මවුස් ල බග්ස් බනීල ඉන්න කාටුන් වලට. ඉතින් මුලින් ළමයි මේවා ඇඳන් ආවත්, පස්සේ බේකරිය මේවා භාරගන්න එක්ක ප්‍රතික්ෂේප කරලා මේ බෝඩ් එක ගැහුවලු. හේතුව මිකී මවුස් අයිති ඩිස්නි ට. බග්ස් බනී අයිති වෝනර් බ්‍රදර්ස් ට. ඉතින් ඒක නිසා පොඩි එකෙක් ඇන්ද මිකී මවුස් ව අය්සින් කේක් එකකට ගහල දෙන එක කොපි රයිට් නීති උල්ලංගනය කිරීමක්. ඉතින් මෙහෙම හැම පොඩි එකෙක්ගේ චිත්‍ර වලට ට කොපිරයිට් නීති බලන්න යන එක බේකරියට කොච්චර වදයක් උනාද කියනවා නම්, අන්තිමට එයාල මේ බෝඩ් ගහල කාටවත් තමන් අන්දපු චිත්‍ර ප්‍රින්ට් කරගන්න බැරි කරාලු. දැන් පුළුවන් එයාල ගාව තියෙන චිත්‍රයක් තෝරාගෙන ප්‍රින්ට් කර ගන්න විතරයි.

ඉතින් දැන් සෝපා කරන්න හදන්නෙත් මේ වගේ දෙයක්. ඒ කියන්නේ මේ වගේ කොපි රයිට් බලපාන අන්තර්ගතයක් සහිත සේවා සපයන සයිට් තියෙනවනේ - උදාහරනෙකට යුටියුබ්, ෆේස්බුක් ගන්න පුළුවන්. මේකෙන් වෙන්නේ මේ කොපි රයිට් වලට යටත්වීමේ දී මේ සයිට් වලට දරන්න වෙන වියදම අධික ලෙස ඉහල නැං වෙනවා. එතකොට ඒ සයිටුත් අර බේකරිය කරා වගේ සාමාන්‍ය මිනිස්සුන්ට එම සේවාව සපයන එක නවත්තලම දානවා.

අපි අන්තර්ජාලේ කරන්න කැමතිම දේවල් තමයි Create, Produce & Share කියන තුන. මේ නීති ආවොත් ඒවා කරන්න වෙන්නේ නැහැ.

මේකේ කියන විදියට මේ නීති වල පිටිපස්සේ ඉන්නේ මාධ්‍ය ආයතන. එයාල මේකට ඩොලර් ලක්ෂ ගණන් වියදම් කරලා තියෙනවා. මොකද එයාලට මේ නීති ගෙනාවොත් එයාලගේ ආදායම තව වැඩි කර ගන්න පුළුවන් වේවි කියල හිතන නිසා. සෝපා පාස් උනොත් අන්තර්ජාලේ සයිට් වලත් අර බේකරියේ වගේ බෝඩ් ගහල තියේවි. ගොඩක් බ්ලොග් උනත් වහන්න තමයි වෙන්නේ.

කතාවේ ඔක්කොම දාන්න අමාරුයි. ටයිප් කරන්න කම්මැලි නේ :) ඒක නිසා  වීඩියෝ එක බැලුවනම් ඔක්කොම දැන ගන්න පුළුවන් වේවි.