අන්තවාදය, සංඛ්‍යානය සහ බ්ලොග්

මිනිස්සු වෙලාවකට හරිම අන්තවාදීයි. හැබැයි පුදුම දේ කියන්නේ තමන්ගේ අන්තවාදය නොපෙනී අනිත් අයගේ අන්තවාදය ගැන උඩ පනින එක.
හැම ප්‍රශ්නයකම දෙපැත්තක් නෙමෙයි පැති හත අටක් උනත් තියෙන්න පුළුවන්.
අර සිංදුවක් තියෙන්නේ 'එක මකුණයි ළමයෝ කන්නේ- ඇයි ඔක්කොම මකුණෝ මරන්නේ' කියලා. ඕවා සිංදුවට කිව්වට මිනිස්සු වැඩ කරන්ඩ ගියාම ඒවා කැලේ.
ඔන්න X කෙල්ලෙක්ට හම්බුවෙනවා සල්ලාල කොල්ලෙක්. කොල්ලා කෙල්ලට හොරෙන් තව කෙල්ලෝ හත අටක් එක්කත් සම්බන්ධකම් තියාගන්නවා. ඉතිං ඒවා කෙල්ලට අහු උනාම කොල්ලව අත ඇරලා නිකං ඉන්නේ නැතුව මුළු පිරිමි සංහතියම සල්ලාලයෝ කියලා කෑ ගහන්ඩ ගන්නවා.
ඔන්න තව Y කොල්ලෙක්ට කපටි කෙල්ලෙක් හම්බු වෙනවා. කෙල්ල කොල්ලගෙන් පුළුවන් තරම් මාල වළලු ඇඳුම් එහෙම කඩා වඩා ගෙන අන්තිමට වෙන සල්ලිකාරයෙක්ව කසාද බඳිනවා. ඉතිං ඒ කොල්ලත් හිත හදාගෙන නිකං ඉන්නේ නැතුව මුළු ගෑණු සංහතියම වංචාකාරියෝ කියලා උඩ පනින්ඩ ගන්නවා.

දැන් මේ X සහ Y දෙන්නටම තියෙන්නේ 'උමං දැක්ම'. අපි උමඟක් ඇතුලෙන් යද්දී ඉස්සරහින් උමං කටේ තියෙන පොඩි වෘත්තාකාර පෙදෙසක් විතරයි පෙනෙන්නේ. එතකොට හිතන්න උමං කට ඉස්සරහින් තියෙන්නේ ලස්සන මල් පඳුරක් කියලා. හැබැයි වටේට තියෙන්නේ ජරා කුණු වළවල්. උමඟ ඇතුළේ ඉඳන් බලන කෙනාට පේන්නේ මල් ටික විතරයි. වටේ තියෙන කුණු පේන්නේ නැහැ. ඉතිං හිතනවා හරි ශෝක් මාර සිරා කියලා.


ඒ වගේ දෙයක් අහන් ඉන්න මෝඩයෝ ටිකත් ඊට පස්සේ කුලප්පු වෙනවා.

කියන්නා කෙසේ කීවත් අසන්නා සිහි බුද්ධියෙන් ඇසිය යුතුයි කියලා මිනිස්සු කිව්වට ඒකත් කලින් කියමන වගේ ගණනකට ගන්න එකක් නෙමෙයි.
තමන් අත්විඳින එක් සිද්ධියක් හෝ සිද්ධි කිහිපයක් පදනම් කරගෙන 'ලේබල්' නිර්මාණය කරගන්න එක මෝඩ වගේම භයානක දෙයක්.
දැන් අර උඩ X කෙල්ලට එක කොල්ලෙක්ව පදනම් කරගෙන කොල්ලෝ හැමෝටම සල්ලාල ලේබලේ ගහන්ඩ අයිතියක් තියෙනවද? නැහැ.
හරි අපි හිතමු X ගේ යෙහෙළියෝ දෙන්නෙක්ට ත් ඒ හා සමාන අත්දැකීම් ලැබුණා කියලා. එතකොට X කෑ ගහන්නේ  මට  විතරක් නෙමෙයි මගේ යාළුවෝ හැමෝටමත් මෙහෙමයි- ඒ නිසා කොල්ලෝ බහුතරය සල්ලාලයෝ කියලා. ඒ උනාට ඒකත් නිවැරදි ක්‍රම වේදයක්ද?
නැහැ. ඇයි?
X සහ ඇයගේ යෙහෙළියන්ගේ පෙම්වතුන් කියන්නේ ඉතාම විශාල කුලකයක ඉතාම කුඩා නියැදියක්. ඒ කියන්නේ නොගිනිය හැකි තරම්. 'කොල්ලෝ බහුතරය' කියන යෙදුම පාවිච්චි කරන්න නම් ඉස්සෙල්ලා නියැඳිය විශාල කරලා බලන්ඩ ඕනේ.
එහෙනම් හිතන්න Z විශ්ව විද්‍යාලයේ සමීක්ෂණයක් කෙරෙනවා කොල්ලන්ගේ සල්ලාලත්වය පිළිබඳ. ඒකෙන් එම විශ්ව විද්‍යාලයේ ඉගෙන ගන්න හැම කොල්ලම අධ්‍යනය කරලා බැලුවම දත්තයක් ලැබෙනවා ඉන් 60% ට පෙම්වතියො  එක්කෙනෙක්ට වඩා වැඩියෙන් ඉන්නවා කියලා.
ඔන්න දැන් X ට කියන්න පුළුවන්ද කොල්ලෝ බහුතරය සල්ලාලයෝ කියලා?
ඒත් බැහැ.
ඔන්න මෙහෙම දෙයක් නම් කියන්න පුළුවනි.
"Z විශ්ව විද්‍යාලයේ ඉගෙන ගන්නා කොල්ලන් 60% කට පෙම්වතියන් එක් අයෙකුට වඩා සිටී"

සංඛ්‍යානය ගැන අවභෝධයක් තියෙනවා නම් මේක ඉතාම සරලයි.


මහ ලොකුවට බුද්ධ දේශනාව ගැන කෑ ගැහුවට දැන් අපි ඉන්නේ මිහිඳු හාමුදුරුවෝ වඩින්න කලින් ගස් ගල් වලට වැන්ද  කාලෙමයි. එකම වෙනස ඒ කාලේ වැන්ද ගස් ගල් වෙනුවට දැන් අපි පිළිම වලට වඳිනවා. බුදු හාමුදුරුවෝ කියල තියෙනවා බියෙන් තැතිගත් මිනිස්සු මේ විදියට හැසිරෙන එක සාමාන්‍ය දෙයක් කියලා. ඇත්තටම මිනිස්සු ගොඩක් වෙලාවට ඉන්නේ මාර භයකින්. ඇස් ඇරන් හිටියම යතාර්තය පෙනෙන නිසා දාගන්නවා අමුතු අමුතු කණ්නාඩි. එතකොට තමන්ට කැමති විදියට ෆැන්ටසියක ජීවත් වෙන්ඩ පුළුවන්. හැබැයි මේ ෆැන්ටසිය දෙදරන්න ගන්නකොට මේ මිනිස්සු පුදුම විදිහට කුපිත වෙනවා. බ්ලොග් වල ලියන එකත් එහෙම ෆැන්ටසි එකක් තහවුරු කර ගැනීමක්. තමන්ගේ ෆැන්ටසි එකට විරුද්ධ අදහසක් ආව හැටියේ සමහරු කුපිත වෙන හැටියෙන් ඒ ඒ පුද්ගලයාගේ මානසික තත්වය ගැන අදහසක් ගන්ඩ පුළුවන්.

වෙලාවකට මට හිතෙනවා බ්ලොග් අධ්‍යනනය කරලා කවුරුත් රිසර්ච් කරන්නේ නැතිද කියලා.